Wuběr rěčow:

Nowostki 2016

Nazymnik

25.11.16
Přeprosymy wšitkich čłonow našeho towarstwa kaž tež zajimcow na lětušu hłownu zhromadźiznu pjatk, 25.11.16 w 19.00 hodź. do gmejnskeje rumnosće při Žabje w Miłoćicach.

Dnjowy porjad:
1. witanje / wotewrjenje; 2. rozprawa k aktiwitam lěta 2016
3. financna rozprawa; 4. diskusija k rozprawam
5. wobzamknjenja k rozprawam 2016; 6. dźěłowy plan za lěto 2017
7. wobzamknjenje sobustawskeho přinoška 2017 a plana 2017
8. wšelčizny; 9. njezjawny dźěl
Ličimy z Wašim wobdźělenjom. Štóž njeje hišće lětny přinošk zapłaćił, njech to na wječoru nachwata. Płaćenje přinoška za 2017 je tohorunja witane.
Wjeselimy so na nowe ideje a dobru naladu, a njezabudźće tež na grat a talerje.
Marko Kowar, w. n. předsydstwa

17.11.16
Wčera wuhladach na našim haće zaso kački: 11 kačorow a 4 kački. Tež hodowny štom tam zaso steji...

Před tydźenjom smy kačku chězku z hata sćahnyli. Chceće widźeć, kajke w njej wupada?  Potym, zo smy w lěću nalehnjene jeja wotstronile a čerstwu słomu zasłali, njejsu wjace kački do njeje zaćahnyli. Ale štó je tam pobył? Tam leži cyła kopica wočinjenych šlinkow z wody (Posthornschnecken).
Tu za was dwaj wobrazaj: ->wobraz 1  ->wobraz 2

móžne wotmołwy su:
a) su sami nutř zalězli a při prěnim zmjerzku so rozpukli
b) to bě šub (Waschbär)
c) mudra wudra (Fischotter)
Wašu prawu wotmołwu wočakuju na hłownej zhromadźiznje.

Winowc

19.10.16
Dźensa sym rozprawu Cyžec Ricardy pod: Zarjadowanja/pućowanske dny/ 2016 wozjewiła - dajće sej lubić!

Myslu sej, zo je so tež wam domchowanka z knjezom fararjom Dawidowskim jara lubiła. Rjana bjesada po tym bě jara spokojaca, tež plincy a pomazki so nam radźichu - wšo smy zjědli!

15.10.16
Swjećimy lětsa zaso domchowanku na žurli CSB. Po kemšach je bjesada. Prošu wobkedźbujće wuwěški we wsy!

póndźela
W tutym měsacu modlimy so zaso zhromadnje róžowc, přeco póndźelu w rumnosći při žabje.

Požnjenc

02.-04.09.16
Žabki pućuja do Čěskeje: Hotel Bon, Pod Špičakem 621, 468 41 Tanvald
wotjězd: pjatk, 13 hodź. z busowho zastanišća w  Miłoćicach

Žnjenc

25.08.16
Dobyćerjo Beachvolleybaloweho turněra běchu lětsa zaso ći samsni kaž loni. Karstens Bierstube a Kowary wudobychu sej pokal. Dohromady hrajachu 20.8. wosom mustwow sobu.

Pražnik

2.07.16
Němska hraje na Italsku a njeje dotal ženje dobyła. Hač so to dźensa poradźi? Přińdźće do Hubertoweje bróžnje!

Smažnik

Sobotu, 18.06.16
dźěłachmy na initiatiwu Laury a Karolin na sportnišću. Jeju Worklečanska rjadownja chcyše wutoru pućowanski dźeń tam přewjesć. To bě holcam hańba, kajke tam wupadaše. Tak smy njerodź z pěska zwutorhali a Andre je wysoku trawu na hrajnišću posykł. Na to hišće sak za wolejbul přičinichmy a čumpjel sporjedźachmy. Zbytne dźěła potom wutoru rano gmejna dočini. To so mi lubi, holcy!

16.06.16
Lěto kopańcy započina so za Miłočanow w Hubertowej ewent-bróžni.

Róžownik

04.05.16
W 17.00 hodź. meja padnje. Runočasnje so žurla za swjedźeń přihotuje. Prosy so wo wjele pomocnikow!

W 19.15 hodź. wotměje so wubědźowanski běh wo mejskeho krala a mejska kralowna so wuzwoli.  Zhromadnej rejce sćěhuje swjedźenski ćah do žurle. Přizamknu so reje a zabawa. Wšitcy su wutrobnje přeprošeni.

Jutrownik

30.04.16
W 17.00 hodź. so meja staja. Wšitke wobydlerjo a hosćo su wutrobnje přeprošene.

29.04.16
W 16.30 hodź. so ranka wije.

27.04.16
Prošu wobkedźbujće wuwěšk při busowym zastanišću w Miłoćicach:
Hałzy za wiće ranki so wobstaraja. Zwólniwi zetkaja so k tomu w 16.30 hodź. při busowym zastanišću.

8.04.16
Zapozdźeny žort k prěnjemu aprilej:
W Serbskim rozhłósu připowědźena wuměna symjenjow a rostlinow pola Budarjec dźensa njebudźe - hegn kónc měsaca.... 
To bě poradźene wabjenje za našu wjes Miłoćicy! Štó drje za tym tči (ćežke to słowo)?

Nalětnik

11.03.16, 19 hodź.
Dajće sej powědać wo dožiwjenjach młodeho “wšudźebyła” Čornakec Franca z Chrósćic na “Najdlěšej šulskej jězbje”.

Mały róžk

1.02.16
Smy derje w Njebjelčicach pobyli! Chcu so wšěm, kotřiž su so na wječorach při basnjenju, molowanju, spěwanju, skakotanju a hromadźe-dźerženju wobdźělili wutrobnje podźakować. Tu pohladajće na wobrazy serbskeho přinoška w Njebjelčanskej Bjesadźe 30.01.16 na 1. kapičkowym wječorju.
wobrazy ->Wandergruppe Njebjesa

Wulki róžk

30.01.16
Póndźemy zhromadnje na kapičkowy wječor do Njebjelčic.

30.01.16
Ptačokwasny program SLA w Chrósćicach (hlej pod www.sne-bautzen.de )
Štó ma zajim?

6.01.16
Pohladajće raz na Wěteńčanske strony - tam je powědančko Mikławša Andrickeho "Boži woheń" wozjewjene. Ricarda je to wšo do prima němčiny přełožiła!

2.01.16
Přejemy wšěm našim sobustawam towarstwa ale tež swěrnym čitarjam tutych stronow žohnowane nowe lěto! Tójšto mamy planowane a něštožkuli so zawěsće přidruži. Dajmy so překwapić!

Adresa / Anschrift

Miłočanska žaba z.t. / Steinerner Frosch Miltitz e.V.
Wjesna dróha 3 / Dorfstraße 3
01920 Miłoćicy / Miltitz
Internet: https://žaba.de / https://frosch-ev.de

Kontakt

Telefon: 035796 96563
E-Mail: info[at]žaba.de
E-Mail: info[at]frosch-ev.de

Naše zaměry / Unsere Ziele

Za wjes, zhromadnosć a serbstwo.
Für Dorf, Gemeinschaft, Sprache, Kultur und Brauchtum.